Betawi Sonoan Dikit

Bagian 8

Fatimah sedang nyiramin kembang di depan gejogan rumahnya. Anak perawan Babeh Mahmud ama Nyak Romlah itu emang terkenal rajin dan telaten. Tetangga udah tau banget kalo Fatimah itu gadis nyang baik dan solehah. Mangkanya banyak orangtua nyang pengen banget jodoin anak bujangnya buat jadian ama Fatimah. Di teras belah sononya Babeh Mahmud lagi asyik gosok batu cincin pake keraras alias  daon pisang nyang kering. Kata orang itu bisa bikin batu cincin makin mengkilap, makin mlisner. Enggak tau sejak kapan Mahmud jadi hobi malein batu cincin. Emang sih belakang nih, orang lagi pada heboh ama batu cincin lantaran liat berita TV ditemuin situs penggalian batu cincin di daerah Tangsel. Udah masyarakat kayak laron selabutan nyariin batu ampe kepojok-pojok giwingan. Kaga boleh liat nyang nrilep dikit langsung dikira batu cincin. Tapi, Mahmud mah beda. Batu cincin nyang dipunyain merupakan warisan engkongnya. Bukan sembarang batu cincin. Bukan batu cincin biasa. Batu cincin tuh ada namanya, Kinyang Badur , kalo dah kenyang langsung tidur. Ada juga beberapa nama batu cincin nyang super unik, ada duri bulan, badar lumut, combong, tapak jalak, gading asem, dan lain-lain. Terserah aje siapa nyang mau kasih nama. Emang batu cincin mah kaga punya emak bapak.

Firman muncul dari balik pager bikin kaget Fatimah. Rupanya Firman sudah dari tadi ngintipin Fatimah. Firman – bujangan asal Padang itu emang udah lama akrab sama keluarga Babeh Mahmud. Firman pasien Mahmud. Lelaki nnyang kaga mau dipanggil Uda itu lebih suka dipanggil Abang, kata Firman supaya lebih Betawi. Ahai..ada-ada aja Uda Firman.

“Neng Fatimah…”, suara Firman ngagetin

Fatimah ampe ngeronjat karena kaga tau slonongboy Firman nongol.

“Eh maafin abang udah bikin Neng Fatimah kaget…”, sambung Firman sambil tetep liatin rada pangling.

“Masih inget ama bang kaga nih?”, Firman nyeletuk lagi

“Bang Firman kan..??”, kata Fatimah ragu-ragu dikit.

Emang Fatimah rada lama juga kaga ngeliat Firman. Namun Fatimah masih hafal lagunya lelaki nyang satu nih, suka caper.

“Alhamdulillah..syukur deh kalo Neng Fatimah masih inget mah, kirain dah lupa..”, jawab Firman bahagia.

“Bang Firman mau ketemu Babeh yah, tuh Babeh ada di teritipan..”

“Kaga..eh..bukan, abang mau ketemu Neng Fatimah koq..”

“Biasanya juga abang nyariin Babeh..”

“Heiii…sini luh Firman, laguan lagi godain anak perawan gue!!!” suara Mahmud lantang. Padahal batang idungnya kaga nongol.

“Tuh kan Babeh dah manggil. Dah sonoh temuin Babeh..”

“Yah..Neng Fatimah, baru aja Abang ketemu dah diusir pergi..” sahut Firman galau sambil ngeloyor nemuin Mahmud.

Fatimah senyum, dalam hatinya Fatimah merasa bebas kaga digodain lagi sama Firman. Padahal Firman menurut Fatimah juga lelaki nyang baik. Orangnya sopan, taat beribadah dan hormat sama kedua orangtuanya. Firman – lelaki asal Sumatera Barat itu emang dah lama tinggal di kampung Legok. Dia pinter main sepak bola. Kalo keluarganya sih udah pasti usahanya, buka Warung Nasi Padang. Jualannya lumayan rame dan laku. Masakannya enak, harganya murah. Emang itu nyang bikin orang pada beli, murah meriah tapi enak dan bikin perut kenyang. Nyos dah.

Mahmud nagewin tangannya pada Firman untuk mendekat. Firman nyamperin. Begitu dekat Firman rada kaget ngeliat Mahmud kaga sari-sarinya demen ama batu akik.

“Wuih..batu milik Babeh licin banget tuh. Batu apaan, Beh?”, tanya Firman sambil jongkok deketin Mahmud nyang lagi gosok batu.

“Pale lu nyang licin. Eh ngapain luh godain anak perawan gue?!”, selidik Mahmud.

“Yah, Babeh…emang kaga boleh dikit apa ngobrol ama Neng Fatimah..”.

“Hmm..gue tau nih, jangan-jangan lu naksir sama Fatimah? Luh tau aja kalo anak perawan gue tuh emang botoh..”, kata Mahmud rada nyombong.

Firman garuk- garuk kepala kaga gatel. Kemudian dia lebih deket pada Mahmud dan ngomong rada anter,

“Emang Babeh kaga keberatan kan kalo saya nih suka sama anak Babeh?”.

Kali ini Mahmud nyang blingsatan. Jedug…atinya kayak digedik matrel. Mendadak banget tuh bocah ngomong dan beraninya.

“Gue sih orangnya gampang, Man. Pan soal, maut rejeki dan jodoh mah Tuhan nyang ngatur. Kita mah manusia cuman jalanin doang. Lah kalo Fatimahnya emang suka ama luh mah, kaga kenapa-napa? Asal jangan luh aja nyang demen dewekan..”, kelakar Mahmud dengan tegas.

Firman keliatan mikir. Dia jadi kawatir dengan apa nyang diomongin Babeh Mahmud, takut kalo Fatimah emang kaga demen sama dirinya dan dia sendiri nyang geer dan demen dewekan. Waduh gaswat. Firman mendehem.

“Kalo batu tuh namanya apa, Beh?’ cetus Firman beralih topik obrolan.

“Hmmm…luh ini, Man. Cemen banget sih jadi laki. Barusan lu ngebet banget ngomongin niat luh buat ngedeketin Fatimah. Eh sekarang luh ganti judul kesoal batu cincin. Sekarang gini deh..gue tanya ama luh, kalo luh gue kasih pilihan; luh pilih nyang mana, nih batu cincin kesannyangan gue atau Fatimah anak kesannyangan gue, hayo?”, tantang Mahmud serius sambil matanya merongos.

Firman ngejubleg mirif bocah tolol dijeguk kepalanya. Dalam atinya Firman nimbang-nimbang. Milih batu cincin kesannyangan Mahmud juga penting. Soalnya tuh batu punya khasiat. Milih Fatimah lebih penting lagi, soalnya tuh empuan emang cakep dan solehah.

“Yaaaa…dia melohok. Bingung dipeliara, Man. Sekarang mah gini aja dah. Gue sih nurutin apa nyang Fatimah mau buat calon lakinya. Cuman satu syarat nyang gue tekenin banget sama dia, tuh calon lakinya kudu pinter ngaji, rajin solat dan taat ibadah. Soalnya biar dia bisa jadi imam buat bininya, juga bisa jadi imam dan guru ngaji di mushola gue. Lu sanggup?”, tantang Mahmud lagi.

Firman mati kutu. Kaga bisa jawab, bibir Firman mingkem. Itu bukan berarti Firman kaga mampu. Firman bisa ngaji, namun ibadahnya masih blang bentong. Solatnya kadang bolong.

“Kalo lu ngerasa sanggup dan mampu, boleh deh luh ngedektin Fatimah. Babeh fair kan?”, tanya Mahmud kemudian karena melihat Firman bingung.

Sambil mengajak Firman berdiri dan jalan nuju mushola, kebetulan udah ampir johor. Firman nurutin aja.

“Nah..kebetul nih udah mau lohor, mendingan luh ambil air wudhu, trus lu adzan di mushola, oke Bro?”, tanya Mahmud lagi.

Firman mengangguk rada ragu. Tapi apa boleh buat, untuk mendapatkan cinta kan emang perlu pengorbanan, begitu kata Bang Haji Rhoma. Firman langsung empron menuju sumur senggot nyang ada di samping rumah Mahmud, nimba air ngisiin gombangan ampe penuh, trus ambil wudhlu dan kemudian adzan. Beres, Fatimah Insya Alloh menjadi milikku, bathin Firman. Mahmud cuman tersenyum ingin ngeliat ujian pertamanya buat Firman. Kemudian kaga berapa lama Fatimah datang sudah mengenakan mukena dan bawa sajadah.

“Ada apa, Beh…koq senyum sendiri..”, tanya Fatimah bikin Mahmud kaget.

“Gue lagi liatin, Firman. Lucu kelakuan tuh anak”, kata Mahmud.

“Apanya nyang lucu, Beh. Bang Firman cuman lagi nimba air”.

“Dia Babeh suruh adzan setelah menuhin gombangan…”.

“Terus…”

“Luh jangan solat dulu, kita jadi makmum. Babeh lagi nugasin Firman buat belajar jadi imam sholat jamaah..”.

“Babeh…???”.

“Luh kenapa sih? Kawatir si Firman kaga bisa mimpin solat? Kalo lelaki muslim kaga bisa mimpin solat dan jadi imam buat keluarganya, terus apa nyang bisa kita arepin?”, saut Mahmud.

“Maksud Babeh..?”

“Yah ada deh…luh liat aja episode berikutnya..”

“emangnya sinetron, Beh..”

“Bukan. Inikan cerita bersambung hehehe..”, kata Mahmud sambil nagakak sambil menuju gombangan mau ambil wudhlu.

Sementara itu Firman masih nimba air dengan timba senggot…

Bersambung….

Majayus Irone/Budayawan/Rumahmediagrup.com/Novel Budaya

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google

You are commenting using your Google account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

Connecting to %s

This site uses Akismet to reduce spam. Learn how your comment data is processed.