Kongkow Cerdas: Aki Maja dan Kong Usman

MAEN BOLA

Gerimis masih ngerucug bae. Aer turun alus banget tapi bikin udara jadi dingin. Kong Usman ngejogrog diteritipan paseban, mau keluar males di rumah aja bosen. Apalagi bininya – Nyi Odah kaga ada di rumah, dia lagi pegih ngaji di mushola ustadz Madin. Jadi dah Kong Usman kesepian. Rumahnya jadi sepi banget kayak kampung abis kena bongkaran. Semua orang kanclep. Ditambah lagi cucu dan cicitnya kaga ada nyang datang maen. Cuman lapat-lapat kedengeran pacekiwuh suara bocah dikejauhan. Uh..nasib, sengsara banget, udah tua kaga ditemenin, gerutu hati engkong. Tapi mendadak, ada suara kenceng banget, “ Gumprang..!!!” dari samping rumahnya. Kong Usman lari ngelongok, dan bujug dah, kaca nako jendela rumahnya gowel, semata kaca pecah. Kong Usman ngeliat ada nemuin bocah ledok nyang lagi asyik maen bola di samping rumahnya nyang masih lebar ngablak.

      “ Hei..bocah ledok, dasar lu pade, kaga punya bero. Maen bola di latar orang. Pecah dah tuh kaca jendela engkong”, tereak Kong Usman marah.

Sekelompok bocah cuman pada cengengesan, “ Maaf kong, kaga sengaja”, jawab Samin sambil nyamperin bola.

Engkong Usman tegopoh-gopoh ambil bola, kemudian dengan sigrah dia masuk ke dalem, bentaran dia nongol lagi di peseban sambil bawa golok.

      “Gua belah nih bola biar luh kaga pada maen bola lagi disini..”, Engkong godotin bendo kebola hingga bola plastik itu kebelah dua.

Sekelompok bocah itu cuman pada bisa bengong melongo, karena kaga berani ngelawan Engkong.

      “Yah, Engkong..trus kalo kita pengen maen bola gimana?” tanya Akim.

      “ Lu maenin aja bola dari gulungan kraras pisang..”, sahut Engkong masih sewot. “ Dasar luh pada bader..”, tambah Engkong lagi.

      “ Tapi masih boleh maen lagi disini ya, Kong?” tanya Simun.

      “ Kaga boleh. Emang luh kaga liat ngapah, tuh latar gue pada ledrug. Dah sonoh maen nya di bulakan desa”, jawab Engkong sambil lemparin bola plastik nyang somplak pada sekelompok bocah. Samin dan Simun sigrah ambil tuh bola. Mereka liatin bola dengan pandangan sedih. Tega banget sih Engkong!

Di saat itu Aki Maja lewat, dia pake tudung leyang, précis kaya pendekar Panji Tengkorak. Gerimis masih turun ngebrolo aja jadi hujan. Aki Maja kaget begitu ngeliat Samin dan Simun serta teman-temannya sedih. Bocah itu langsung ngaduin pada Aki,

      “Bola aye dibelah sama Kong Usman..” nadanya nelangsa.

      “Apa? Bujug dah, tega banget tuh Engkong”, Ki Maja nyamperin Kong Usman dan bediri diluar peseban. Kong Usman masih megangin bendo. Ki Maja merengked. Asal jangan dia ngambek aja, bisa berabe – tuh bendo bias melayang dan nancep di jidat!

      “ Luh tega banget ama bocah, Kong. Biarin aja mereka pada maen bola, siapa tau aja kalo udah gede nanti mereka jadi pemaen Timnas”, kata Ki Maja.

      “ Maennya aja kaga pada ngurus. Maen dilatar gue. Emang latar gue lapangan bola apah? Kalo mau maen kan ada lapangan desa..”, sahut Engkong.

      “ Yah, engkong ketinggalan jamin. Mana ada lapangan bola di desa, Kong. Pan udah lama di gusur dijadiin puskesmas. Separonya di buat ruko. Mau maen bola di puskesmas tuh bocah?”, kata Ki Maja lagi.

      Kong Usman melohok. ilok? Rupanya dia kaga tau. Emang udah lama Kong Usman kaga datang ke bale desa sejak Lurah Majen pengsiun kaga jadi lurah lagi.

      “ Oh gitu, kaga ada lapangan bola? Pantesan bocah pada maen dilatar gue. Kasian banget tuh bocah..”, dumel Kong Usman ngerasa salah.

Emang lapangan bola semakin langka, lantaran banyak pejabat dan tata kota salah dalam ngelola fasos dan fasum. Buktinya aja banyak lapangan nyang berobah fungsi jadi mall, jadi ruko, jadi tempat parkir, jadi terminal, jadi pasar malem. Lah kalo udah kaya gini kan dampaknya bocah pada susah nyari lapangan buat maen bola. Ujung-ujungnya, pantesan aja kalo Timnas kita keok mulu ngelawan tim laen. Kaga ada tempat latihan, susah nyari bibit pemaen. 

      “Kalo gue kaga salah denger, pan Pemkot udah bikin stadion nyang gede, suruh aja bocah pada maen disonoh”, kata Kong Usman lagi

      “Yah..lu lagi, Kong. Emang maen disonoh bisa gratis. Kudu bayar, Kong. Mana punya duit bocah udetan kaya ginih maen disonoh. Bahkan kabar angin nyang gue denger juga, katanya stadion tuh udah mau di pinjem kesebelas Persija buat base camp..”, kata Ki Maja rada bergidik.

      “Waduh…lah trus, kesebelasan kita, Persipasi mau ngandang dimana?”, tanya Kong Usman bingung.

      “Suruh ngandang aja di gejogan rumah Engkong”, kelakar Ki Maja lagi sambil deketin bocah. “ Udah ntar juga engkong baek lagi, luh boleh maen lagi disini”.

Bocah kegirangan dan jejingkrakan. Saking girangnya tanah becek ngeciprat ke celana komprang Aki Maja hingga blepotan. Aki cuek aja dan malah ikutan maen becekan. Nggak lama kemudian Engkong Usman datang bawa bola plastik cucunya ke latar.

      “Nyok kita maen lagi..!!!” kata Engkong sambil lemparin bola.

Bocah ledok langsung ngegrumut rebutan bola. Tendang sonoh tendang sinih. Aer kotor dan tanah becek nyiprat sanah nyiprat sinih. Pokonya seru dan lupa kalo mereka pada belepotan…mungkin dalam ati kecilnya mereka juga ngimpiin, kapan yah bisa maen di stadion?

Gerimis berobah jadi ujan deras…maen bola makin seru.****

Majayus Irone/Budayawan/Rumahmediagrup.com/Cerpen

One comment

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google

You are commenting using your Google account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

Connecting to %s

This site uses Akismet to reduce spam. Learn how your comment data is processed.