Betawi Sonoan Dikit

Bagian 13

Mobil nnyang ditumpangi Romy berhenti di pelataran rumah bergaya betawi. Pelataran itu luasnya lumayan. Sekelilingnya gembel oleh pepohonan. Di sudut lapangan ada pendopo bersebelahan dengan mushola kecil tetapi nyentrik. Pagi itu Romy cuma diantar Gayatri dan sopir. Murtado kaga ikut lantaran dia lagi nemuin cukong material Koh Culai di daerah Sasak Papan deket Kampung Rawa Semut. Rumah nnyang berpeseban besar itu nampak sepi. Sunyi. Kaga ada sepotong pun orang nyang nongol. Tanda-tanda kehidupan kaga keliatan pisan. Atau jangan-jangan gue salah alamat? Pikir si sopir sambil garuk kepalanya nyang mlisner.

            “Betul ini rumahnya, Sir?”, tanya Gayatri sama sopir nnyang bernama Nasir.

            “Kalo saya kaga salah sih emang ini nyah..”, sahut Nasir agak pelo dikit.

            “Lu yakin? Lu kaga salah belok?”,

            “Saya sih yakin banget nyah, pan di depan tadi kita udah tanya sama orang, katanya nyang rumahnya gede sama latarnya lebar dan punya mushola kaga salah lagi pasti itu rumah Babeh Mahmud. Lah ini précis bener sama nyang orang omongin”, cerita Nasir bikin yakin hati Gayatri nyang udah keliatan galau.

            “Ya udah..kalo emang luh dah yakin mah luh turun ketok pintunya kek atau kasih salam”, kata Gayatri merintah Nasir.

Nasir kedakar kedeker kayak ayam biang mau nelor. Belon juga turun dari mobil. Mobil juga masih dibiarin ngedudud mesinnya. Pas Nasir buka pintu mobil dan mau turun, bersamaan juga pintu pager depan rumah ngejeblak di dorong seseorang. Lelaki bertubuh tinggi gagah dengan kumis baplang dan mengenakan setelan pangsi nongol. Dipinggangnya disoren sebilah golok. Lelaki itu menatap tajam kearah mobil. Di dalam mobil Nasir merengked. Gayatri keliatan takut. Romy ngumpet dijok dengan ngeringkuk padahal kakinya sakit.

            “Wah…gawat ini mah nyah. Kita salah orang. Jangan-jangan dia ngerasa keganggu dan marah. Tuh dia nyamperin kita..”, suara Nasir jiper.

            “Luh gimana sih Sir. Turun sono, temuin orang itu..”.

            “ga berani nyah”.

            “Eh lu lelaki bukan sih? Masa lelaki pengecut..”

            “Den Romy aja nyang turun..”

            “Nasir…kaga liat apa luh kalo kaki Romy masih patah..”

Nasir melempem. Dia melirik kepada lelaki gagah itu nyang mulai keluar dan menggonnyang-gonnyang gagang golok…

            Akhirnya Nasir turun juga meskipun takut. Kemudian dengan rada ngerunduk dia mulai bicara,

            “Assalamualaikum, maaf mau tanya nih? Apa bener ini rumahnya babeh Mahmud?”

Mahmud kaga buru-buru nyahut. Matanya nyang tajam beralak-berilik ngeliatin Nasir dari ujung rambut ampe ujung kaki. Bikin Nasir makin jiper. Nasir ngerasa nyalinya dipijit-pijit. Pada merecet dan makin takut.

            Mahmud mendehem, “Ada perlu apa luh nyariin Babeh Mahmud?”.

            “Hmmm…mau berobat,Beh. Katanya Babeh Mahmud tuh jago ngobatin patah tulang. makanya aye datang dimari. Apa bener ini rumahnya?”, kata Nasir sambil nyinyir.

            “Oh…gue kira lu mau ngapain. Emang luh kaga kenal sama orangnya?”

            “Kaga. Katanya sih orangnya tuh baik hati dan tidak sombong..”

            “suka menabung kaga?”, cetus Mahmud

            “Kalo punya duit sih suka nabung, tapi kalo kaga punya apa juga nyang mao dicelengin?, sahut Nasir.

Mahmud melotot. Nasir takut salah ngomong.

            “Bener, gue nih Mahmud. Emang sapa luh nyang sakit dan patah?”

            Nasir sumringah. Hatinya lega.

            “anak majikan aye, Romy. Tuh ngumpet di dalem mobil”.

Mahmud jejingke ngeliat isi mobil. Romy ngeringkel mirif engkuk. Gayatri nyungsepin muka di jok mobil. “Udah suruh turun semuanya, gue tunggu di dalem”, kata Mahmud sambil ngeloyor masuk. Nasir sigrah ngedeketin mobil dan buka pintunya. Gayatri kaget dikiranya mobil dibuka lelaki gagah tadi. Cengul aja, Nasir nyang nongol.

            “Kata Babeh Mahmud kita boleh masuk, Nyah. Buruan turun dah”.

            “Bener Sir?”, tanya Gayatri masuh takut

            “Bener Nyah. Tuh udah diawe-awe dari tadi” sahut Nasir sambil nyolek Romy nyang masih ngumpet. “Den buruan turun, kita udah boleh masuk”, lanjut Nasir pada Romy. Romy segera ngegrenjal dan duduk.

            Gayatri jalan duluan. Romy ngususl dengan langkah cingked di papah oleh Nasir. Mereka diterima oleh Mahmud dan duduk dibale bambu nyang lebar. Mahmud keliatan sibuk megangin termos air panas. Piker Nasir paling juga diseduhin kopi. Nasir udah sesegukan aja pengen minum kopi.

            “Dahl uh bebaring disono, di ujung bale”, kata Mahmud pada Romy.

dengan dituntun Nasir – Romy menuju ujung bale dan direbahin. Gayatri duduk agak jauh dikit. Gayatri gelisah begitu ngeliat Romy meringis waktu kakinya ditarik oleh Nasir. Untung kaga kentut. Mahmud ngedeketin Romy sambil nanya, “Emang ngapah kaki luh ampe patah? Jatoh dari pohon?”.

            Romy ngga nyahut. Gayatri juga ngga ngasih tau, Nasir juga diem.

            “Lah…lu betiga bolot semua ye? Pada diem aja kaya ga-ang kejepit plupuh bale”, kelakar Mahmud.

Alhirnya Nasir nyahut setelah Gayatri memeberikan intruksi dengan melirik.

            “Jatoh sewaktu ngetrek, Beh?”, ujar Nasir

            “Oh…ngetrek liar. Untung kaga mati cuman patah doing”.

Patah dibilang masih untung? Bathin Romy.

            “Jadi lelaki mah jamak cuman patah mah. Apalagi cuman jatoh dari motor. Orang-orang mah jatoh dari kapal jet..”, kata Mahmud sambil mulai mendekati Romy. Mahmud bawa termos.

Nasir semula nunggu kapan bikin kopinya?. “Luh tahan dikit yah…”.  Spontan Mahmud buka termos dengan air nyang masih panas diguyurin diseluruh bagian kaki Romy nyang patah. Romy jengker. Nangis ngraung kayak bocah minta jajan kaga dikasih duit. Nasir meringis. Gayatri ketakutan dan kaga mau ngeliat.

            “Adem kan?” tanya Mahmud sambil siap nuangin lagi.

Adem pala lu bau menyan! Gerutu hati Romy. Panasnya kaga ketulungan. Kaga ketahan. Romy ampe nangis bombai. Kali ini Mahmud mau nuangin lagi. Romy siap-siap narik nafas…

Bersambung…

Majayus Irone/Budayawan/Rumahmediagrup.com/Novel Budaya

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google

You are commenting using your Google account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

Connecting to %s

This site uses Akismet to reduce spam. Learn how your comment data is processed.