Kongkow : Aki Maja dan Kong Usman

MPLS DIMUSIM COVID 19

Tiap taun ajaran baru pasti ditandain dengan kegiatan MOS/MPLS kalo tingkat  SD/SMP/SMA. Aki Maja juga lagi nungguin cucunya nyang baru masuk SD ikutan Mos. Tuh bocah ditugasin pake kuncir pita laen sebelah merah ama putih. Tasnya dari kantong terigu. Kalungnya tutup botol. Ada kalungan cabe, bawang, mecin dan permen. Pokoknya unik dah. Apalagi kalo nyang ngikut mos anak SMP/SMA pasti lebih reboh lagi. Aki Maja ampe ngimpleng aja ngeliatin cucunya yang lucu dan imut- Kinoy nyang umurnya baru jalan tujuh taun. Bocah-bocah pada dibarisin dilapangan. Eh lagi serunya Aki mrelengin cucunya ngedadak dikagetin Kong Usman nyang juga nguplek disitu.

      “Hayooo…luh ngapain ada disini, Ki?”

      “Lah lu juga ngapain udah engkong-engkong main di SD. Mau daftar sekola?”

      “Gila kali…masa udah tua bangkotan kaya guah masup SD. Bisa disangka Aki-aki nyasar, ah luh bisa ajah”, sahut Kong Usman gusar.

      “Kirain. Lah guah mah kemari lagi jagain cucu guah nyang lagi MOS. Noh…sebelah sonoh..”, kata Aki sambil nunjuk Kinoy nyang lambein tangannya.

Kong Usman celingukan nyariin cucunya nyang kaga keliatan. “Nah tuh, nyang gembrot monto cucu guah, Syahrini”, kata Engkong pede.

      “Bujug dah, guah kaga saah denger Kong, cucu luh namanya Syahrini?”, Aki melotot.

      “Lah ngapah emang…ada nyang salah?”

      “Kaga…cuman aneh ajah..”

      “Aneh ngapah, atau luh mau tau ceritanya?”

      “Boleh dah…”

      “Tuh anak mantu guah kebetulan dari dulu ngidamin Syahrini. Eh pas lahir anaknya empuan dikasih nama Syahrini…”

      “Wah tau gitu mah, cucu gua nyang laki guah namain aja Anang, hehehe”.

Anak-anak mengikuti semua intruksi dari guru. Bebaris sambil nyanyi dan tepok tangan. Seru banget. Tuh anak pada girang.

      “Eh…luh denger kaga, Kong. Kalo ada nyang meninggal gara-gara ikutan MOS?”

      “Iya tuh…emang ngapah tuh anak ampe meninggal? Emang di MOS digebukin?”

      “Buneng…lah kaga atuh. Emang tuh anak maling sendal ampe digebukin…”

      “Katanya kalo MOS suka kelewatan. Tuh di TV guah liat ampe mentri turun tangan”.

      “Emang sih kadang kakak kelas suka bikin aturan sendiri. Mangka nya, Wakil Kesiswaan kudu gegetun dan sering mantou saat MOS supaya kaga kejadian”.

      “Mangkanyah guah mandorin cucu guah. Takut digalakin sama gurunya…”.

      “Itu mah kebangetan atuh, Ki. Kaga. Guru juga punya perasaan sayang ama muridnya. Tapi sekedar pesan sih boleh-boleh ajah. Kalo MOS nyang wajar-wajar ajah gitu”.

      “Guah setuju. Kalo MOS itu jangan nyang aneh-aneh. Sederhana ajah nyang penting tujuannnya ngedidik…begicu”, sahut Kong Usman lagi.

Lonceng berdentang. MOS hari pertama berakhir. Anak-anak selabutan bubar. Kinoy dan Syahrini berlarian mencari Aki sama Engkongnya nyag udah dari tadi nungguin. Lamunan Aki Maja buyar,…itu kalo keadaan normal. pegimana MPLS di Musim Covid 19? Online kali yeee**

Majayus Irone/Budayawan/Rumahmediagrup.com/cerpen

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google

You are commenting using your Google account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

Connecting to %s

This site uses Akismet to reduce spam. Learn how your comment data is processed.