Kongkow aki maja dan kong usman

Pejabat dan Korupsi

Ki Maja lagi duduk cengkere di atas bale sewaktu Kong Usman datang dan juga ikutan duduk dibangku nyang satunya lagi. Raut muka Ki Maja keliatan serius ampe jidatnya pada begaris. Kulit  Zebra kalee. Kong Usman langsung aja buka omongan dengan ucapan salam yang dibalas juga dengan salam takzim.

“Ada apa Ki, keliatannya serius banget? Pejabat aja mikirnya nggak kaya gitu, nah situ cuman rakyat jelata mikirnya ampe nyaingin pejabat?”, Kong Usman nyablak.

“Nah lu tau nih gue lagi mikirin lagunya pejabat. Iya, gue ampe kaga abis fikir, negara kita mau dibawa kemana ya? Lah kalo saban ari nyang kita denger ada oknum pejabat mulu nyang kurupsi. Bentar-bentar berita kawin cere, bentaran lagi berita selingkuh, nih dunia kayanya isinya begituan mulu..”, Ki Maja mulain nimpalin ngoceh.

“Namanya juga dunia, Ki. Kan dunia panggung sandiwara. Dunia ini Panggung sandiwara…begitu kata Ahmad Albar – Godbless. Yah mao dikata apalagi, kalo emang itu mulu nyang ada. Pan kita mah nyang udah bau tanah ini udah dari dulu ngasih conto nyang baek, ngasih nasehat nyang cakep..lah dasar bocahnya aja kaga pada idep..”, sahut Kong Usman lagi lebih serius.

“Apa lu kate barusan, kita bau tanah, setau gue lu nyang bau ketek, belon mandi ye??”, Ki Maja nebak.

Kong Usman raba keteknya dan ngendus. Bau dikit. Kemudian nyengir liatin giginya yang ompong.

      “Terus kita musti bikin apa, pan kita mah cuman rakyat kecil nyang beda banget ama pejabat nyang orang terhormat. Pejabat mah omongannya manjur, kalo rakyat paling juga omonganya cuman, “ ya nanti kami tampung” ga tau ampe kapan tuh tempat nampungnya luber. Pan begitu kalo kita ngadu ke Pemkot hehehe..”, sahut Kong Usman lagi.

Emang belakangan ini kita semua dibikin keder oleh ulah oknum pejabat nyang terus gerogotin duit negara dengan hobi kurupsinya. Ibarat kata negara sebuah “celengan semar” belon juga seseg repel, negara belon juga gendut, tuh duit udah keburu dirogohin mulu. Duit negara nyang kudunya buat sejahterain warga, biayain fasilitas publik, eh malah dirampok oknum pejabat buat ngisi kantongnya pribadi beserta rengrengannya. Kempes dah negara kita. Negara udah kuru kayak pohon kelor ditempelin kemaduan.

      “Aki mah nggak perlu kuwatir, pan ada penegak hukum, ada KPK, ada aparat kepolisian nyang tugasnya ngayomin rakyat, kita percayain aja ama dia..”, kata Kong Usman yakin.

Ki Maja diam melongo, mikir. Emang Ki Maja tuh orang pemikir, liat aja rambut dikepalanya udah penuh ama kembang jambu alias ubanan. Pernah suatu ari di suatu sore pada ngomongin soal uban. Katanya, orang nyang kepalanya cepet ubanan lantaran kebanyakan mikir dan punya otak. Lah..kalo nyang kaga ubanan berarti kaga pernah mikir dong, trus….nggak punya otak? Otak – Otak. Kaga dah. Itu mah alesan aja. Kalo itu didenger orang, bisa dibledogin tanah kita.

      “Moga aja pihak nyang berwenang cepet nangkepin oknum pejabat nyang suka kurupsi. Trus diadilin nyang adil. Kalo gua mah setuju banget sistem keadilannya kaya di China sonoh, nyang kurupsi dihukum mati dan masukin dipeti mati. Biar kapok. Ato kaya di Arab, di potong aja tangannya nyang suka nyuri duit negara..”, saran Kong Usman.

Ki Maja melotot. Mulutnya ampos mau ngomong.

      “Lah kaga bisa begitu, Kong. Pan negara kita mah dasar negaranya Pancasila, beda ama negara laen. Maka hukum nyang dijalanin juga hukum nyang berlandaskan Pancasila. Kalo semua oknum pejabat dihukum kayak di China ato Arab, emang sih orang pada kapok, lah cumanan olok pejabat hihihi…”, Ki Maja cekikikan.

      “Biarin aja Ki, siapa tau kita kebagian jatah jadi pejabat hehehe…”.

      “Lu ngelindur kali, emang dah berapa umur lu, bentar lagi juga modar”.

      “Becanda Ki, gua mah sadar diri, pan kita dah tua, tugas kita mah kasih nasehat aja ama nyang muda, kasih contoh nyang baek-baek. Moga-moga generasi kedepan bangsa nih, lebih baik, lebih punya moral, lebih punya rasa malu, lebih punya kepedulian dan lebih berintegritas. Niscaya dah Indonesia bakalan hebat di mata dunya”, sahut Kong Usman lagi.

Mentari makin tinggi. Udara perlahan panas. Ki Maja ngegeser kursi. Kong Usman juga ikutan mingser ngindarin cahaya mentari nyang panas.

      “Eh, by the way lu mau kemana dah empron banget?”, Tanya Ki Maja kemudian.

      “Aduh gue ampe lupa, padahal gue mau ke Pasar Kecapi disuruh bini beli gabus kering…telat dah. Ya udah. Gue pergi ye. Assalamualikum”, Ki Usman langsung pergi.

      “Waalaikumsalam. Gue nitip ya..salam buat Koh Aceng..”.

Kong Usman nggak noleh terus aja ngibrit.

      “Untung gue cuman korupsi waktu dikit doang, hehehe…”, gumam Ki Maja sambil masuk ke rumah. *****

Majayus Irone/Budayawan/Rumahmediagrup.com/Cerpen

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google

You are commenting using your Google account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

Connecting to %s

This site uses Akismet to reduce spam. Learn how your comment data is processed.