Betawi Sonoan Dikit

BAGIAN 5

Jalan raya Caman nuju Jati Bening emang terkenal macet. Udah jalannya rada kecil ditambah lagi sama angkot nyang kadang berenti turunin sewa penumpang semaunya. Apalagi pada jam berangkat atau pulang kerja karyawan. Duuh…jalan rasanya jadi lama banget. Dan sepanjang jalan nyang dilewati aspalnya kaga rata bahkan banyak nyang gowel dan belubang disana sini. Kalo kaga ati-ati bagi pengendara bisa kejeblos. Nggak sedikit juga terjadi kecelakaan. Nyang lebih parah lagi kalo turun hujan, jalan nyang bolong keisi aer, kaga keliatan, jebrus… ban kelelep masuk lubang dan nyang bawa motor jatoh nyungsep. Kalo nginget itu bikin Fatimah ngerasa takut. Takut Midin jalannya kaga ati-ati.

“Pelan-pelan aja ya, Bang. Jalannya jelek..”, kata Fatimah mesen.

“Tenang aja, Neng. Abang pasti ati-ati banget. Masa iya sih abang mau bikin Neng Fatimah celaka, nggak bakalan atuh..”, sahut Midin pede.

“Makasih, Bang”, jawab Fatimah pendek.

“ Wah…kalo ampe Neng Fatimah celaka, abang bisa digoco sama Babeh Mahmud”, jawab Midin lagi.

Motor terus melaju rada pelan nyusurin jalan Jatikramat lewatin jalan Dokter Ratna. Satu belokan lagi hampir mendekati Komsen. Tapi Fatimah nggak berniat mampir dulu ke rumah Cang Rohim, dia justru mau pulang ke rumah Babeh Mahmud. Makanya Midin belok kanan ke arah Kodau Rawa Bogo. Tentu saja sepanjang jalan nyang dilewatin rada berobah. Dulu mah jalan Jatikramat masih sepi, sekarang udah rame banget. Kanan kiri jalan udah pada bediri ruko dan bengkel. Tanah bulakan nyang dulu kosong udah disulapin jadi klaster. Kampung udah kaga sepi lagi. Sekarang jadi lebih rame. Kata orang dulu mah jalanan kampung itu banyak gerumbang dan alang-alang tempat jin buang anak. Jalan tanah nnyang diawurin batu kolar. Sekarang jalannya udah lumayan mulus meskipun ada juga nyang pada belobang. Tapi mendingan.

            Midin ngelewatin bunderan nyang diujung plekukannya bediri warung nasi uduk Wak Genah nyang nyohor. Jualannya murah meriah. Kalo beli nasi uduk sepiring mentung pake semur jengkol barang beberapa jelebek dikasih sambel kacang,..hmm sedep bener. Tapi sekarang warung itu udah kaga ada digantiin ama toko aneka roti. Ojek Midin berenti dilatar depan rumah Mahmud nyang luas. Sreg aja motor ngangsrog direm. Fatimah turun lalu bayar beberapa lembar sepuluhribuan.

“Makasih, Bang udah nganterin Fat dengan selamat nyampe rumah”, kata Fatimah setelah turun dari jok motor.

“Sama-sama, Neng Fatimah. Abang juga senang bias nganterin Neng Fatimah pulang koq”, sahut Midin sambil cengar cengir.

“Ini ongkosnya bang. Makasih” kata Fatimah kemudian sambil ngegloyoh menuju paseban.

“Abang nggak mampir yah, salam aje buat babeh”, kata Midin sambil parkir motor dan kemudian pergi.

Padahal Midin ngarep banget diminta mampir lalu ngobrol sama Fatimah. Kemudian asyik curi-curi pandang. Dasar panjul, malu tuh ama anak bini! Midin merinding. Tukang ojek itu ngibrit dan lenyap dibelokan jalan arah Legok.

***

Mahmud dan Romlah keliatan resep banget liatin Fatimah. Mata Mahmud dan mata Romlah ampe kaga ngedip ngeliatin muka anaknya nyang makin botoh aja. Maklumin udah lama keluarga ini kaga ketemu ama anak gadisnya lantaran Fatimah mukim di pesantren di Ujung harapan sonoh. Dan begitu Fatimah pulang ke rumah jadi pangling. Ampir kaga percaya gituh.

Romlah nyendokin nasi ampe munjung dipiring kaleng buat Mahmud. Kemudian di atasnya dikasih kuah ikan gabus kering dikuningin campur so’un dan besanten. Lezat pastinya. Kemudian dia nyendok buat dirinya. Fatimah nyendok sendiri.

“Dah..baca doa dulu, baru makan. Ayo makan Bang, jangan melongo aja. Ntar makanan keburu kaga enak”, kata Romlah membuat Mahmud kaget kalo dia sedang ada di meja makan.

“Ya…bawel banget. Emang luh kaga tau apa kalo gua lagi resep ngeliatin anak kita nyang makin gede dan udah jadi gadis”, jawab Mahmud sambil kekobok cuci tangan. Kemudian dengan lahap dia mulai makan.

“Enak banget nih sayur kuning bikinan luh..”, kata Mahmud lagi

“Dari dulu juga sayur kuning bikinan aye mah emang sedep bang”, sahut Romlah sambil juga mulai makan.

“Sayur gabus kering masak kuning santen kaya gini udah susah ditemuin. Udah banyak nyang kaga bisa ngolahnya. Kan lu tahu kalo masakan ini warisan nyak kita. Makanya jangan ampe ilang. Kudu dilestariin. Nah, kebetulan Fatimah pulang, ntar lu ajarin dia masak..”, komentar Mahmud sambil nyuap nyeketem.

“Fat, lu dengerkan omongan baba lu, emang lu mau belajar masak?”, tanya Romlah sambil matanya nyureng kepada Fatimah.

Fatimah kikuk,

“Ya mau atuh, nyak – beh. Nah kalo bukan anak muda kaya Fat, trus siapa lagi nyang mau nerusin tradisi leluhur..”, jawabnya mantap.

Mahmud senyum mlowek. Romlah juga seneng.

“Syukurlah. Lagian jadi anak perawan mah emang kudu bisa masak buat calon laki lu nanti..”, kata Mahmud lagi.

“Ya, betul tuh Fat. Nyak aja dulu waktu ngebakal ditanya ama nyak, eh tu bisa masak kaga? Untung enyak bisa masak, jadi deh dilamar sama babah lu”, cerita Romlah inget masa muda dulu.

Mahmud natap Romlah. Hmm… Romlah emang masih tetep cakep seperti duapuluh taun nyang lalu, waktu dilamar dulu. Dan cakepnya Romlah nurun ama Fatimah.

Fatimah juga mulai makan. Menikmatin suap demi suap sayur gabus kering masak kuning santen nyang udah lama kaga didapetin di pesantren. Dan suasana makan nyang kaya gini nyang bikin Fatimah kangen. Karena udah lama banget dia kaga makan bareng sama orangtuanya. Dimana sebelon atau sesudah makan, babah atau enyak selalu ngasih wejangan, kongkow ringan. Berkumpul dimeja makan bikin kekeluargaan jadi anget, kedekatan antar keluarga jadi mantep. Biasanya makan bareng dengan teman santri di pesantren. Hmm..makan bareng nyang keliatannya sepele ini nyang bikin suasana jadi akrab. Hubungan anak dan orangtua jadi harmonis. Fatimah sangat kangen suasana ini seperti juga Mahmud dan Romlah.

***

Jalan raya tengah ari bolong. Romy nyemplakin motor gedenya dan puter-puter gas bikin motor jejeritan dan pengang telinga. Di sebelahnya Jody kaga mau kalah saing nyangkro dengan sombong di atas motor gede juga sambil puter gas sekenceng-kencengnya ampe suara mesin bebengeran. Sementara Puspa – gadis bahenol semester dua jejingkrakan girang melihat kalo ada dua cowok ganteng dan tajir ngerebutin buat dapetin cintanya. So sweet gitu. Padahal kelakuannya bisa dibilang membahayakan. Sekelompok ABG cewek cowok sorak sorai berteriak sambil tepok tangan kaya lagi nonton sirkuit di Sentul. Muka Romy keliatan tegang dari balik kaca helm. Sementara itu muka Jody juga cembetut kesel karena ngga mau kesaingan. Dua cowok itu emang lagi tunjukkin nyali kali diantara mereka bedua itu siapa nyang paling pantes buat dapetin cintanya si Puspa. Permusuhan kayak di sinetron-sinetron remaja nyang tanyang di televisi.

“Asal lu tau, Rom…gua kaga bakalan ngalah buat dapetin ati Puspa dari lu”, ejek Jody dengan suara kasar.

“Gua jabanin, Jod. Siapa takut. Emang lu doang nyang benyali gede. Maaf-maaf kata gua kaga takut pisan saingan ama luh”, sahut Romy dengan suara sogol.

Kedua lelaki tanggung itu saling tatapan. Suara mesin motor makin menggerung. Bising banget. Suara sorak sorai penonton juga riuh rendah. Uplek banget.

“Lu dah pada siap? Ayo gua itungin. Satuuuuuuuu. Duaaaaaaaaaaa. Tigaaaaaaaaa, goooo!” teriak Puspa cempreng.

Bersamaan dengan itu kedua motor tadi bablas seperti kebo dipecut pantatnya..