Kongkow Cerdas: Aki Maja dan Kong Usman

MUSIBAH

“Et dah, ini mah kaga kelar-kelarnya cobaan. Nyang satu baru lewat nyang atunya lagi nongol. Blon ge ngerasain enak rebahin awak di atas bale, udah pengang kuping denger kabar nyang lebih ambreg lagi”, gerutu ati Aki Maja sambil terus aja bolak balikin Tabloid Danta. Tuh Aki nyari apah tau dari tadi impleng aja. Koran dibolak dibalik ampe lidig dan kucel.

Sementara tuh, angin siang seliweran panas beud karena suhunya ampe ngedeketin angka 35 derajat selsius ngebringsang. Tanda-tanda musim ujan belon juga keliatan. Padahal nih kampung udah pada kekeringan. Sawah udah pada meletak, dan poon padi pada mati kekeringan betela.

      “Kaga baek idup didumelin mulu. Emang dasar manusia aja nyang kaga pernah terimanya sama Sang Pencipta. Dikasih panas ngegerutu kekeringan, eh pas dikasih ujan ngegerutu kebanjiran. Serba salah ajah. sekarang dikasih Corona, baru nyaho luh”, seloroh Kong Usman kaya tau nyang dipikirin Aki.

Aki Maja kaget, kaga sangka Engkong tiba-tiba ngomong begitu. Aki cengengesan liatin giginya nyang ompong. Engkong merelengin matanya rada sewot.

      “Bujug dah, guah ampe kaget, Kong. Tiba-tiba luh ngoceh pas banget ama pikiran guah. Luh punya elmu apaan sih?”, tanya Aki sambil kasih tabloid buat Engkong.

      “Guah mah nebak ajah. Guah liat luh romannya suntuk banget kaya pejabat nyang lagi keteteran didemo warga hehehe..”, kata Engkong sambil ngebet tabloid. Di tabloid kali ini ada berita seru tentang PSK nyang mau naek haji, film layar lebar Harim Di Tanah Haram nyang ditulis oleh Majayus Irone – tuh bocah Bekasi nyang katanya budayawan dikit.

      “Guah mah kaga ngarti sekarang, ampir saban ari berita musibah. Kaga di tivi kaga di koran atawa tabloid. Belon lagi berita tentang pemerentah dan wakil rakyat nyang bikin kuping pengang. Eh kita mah lagi pada kelabakan nyari duit karena harga pada naik, dia mah anteng-antengan bawa keluarga keluar negeri. Udah gitu pake selfi lagih? Najong dah!”, gerutu Aki sambil dehem.

      “biarin aja, Ki. Pan nanti kudu dipertanggung jawabin sama rakyat. Pan mereka tuh wakil rakyat, tugasnya mikirin rakyat, makmurin rakyat…”, timpalin Engkong sambil ngebet halaman tabloid.

Di tabloid ada berita macem-macem. Engkong mulai baca. Engkong bisa baca loh, meskipun cuman tamatan SR atau sekolah rakyat. Emang bocah sekarang, ada nyang udah kelas tujuh SMP kaga bisa baca!

“Sekarang nih, emang lagi banyak musibah dan cobaan. Ibadah haji tahun 2015 aja ngalamin banyak musibah. Ada badai topan bikin crane jatoh dan nimpa calon haji hingga makan korban, terus longsor, eh terus aja lagi tragedi Mina nyang nelen korban ampir 730 jamaah lebih. Belon lagi bencana dibelahan bumi nyang lainnya. nah sekarang tahun 2020 ada Covid 19. Apa ini tanda-tanda kiamat udah deket ya, Ki?”, tanya Engkong rada gemeter.

“Kayanya sih emang begitu, Kong. Abisnya manusia udah makin pinter makin belagu. Kurang bisa ngerawat bumi. Makin tinggi elmunya makin ngurangin ketaqwaannya. Kata guah mah, manusia makin sembrono dan lupa diri. Makanya Sang Pencipta mulai murka dan ngasih peringetan..”, sahut Aki begaya ustadz nyang suka muncul ditivi.

“Bener banget. Itu sindiran buat luh nyang udah bau tanah kudu mulai nyadar diri”.

“Nah. Luh juga dah bangkotan…kudu lebih nyadar lagi”.

“Udah. Sama-sama tuwir mah kudu nyadar barengan aja hikhikhik…”

Matahari disebelah kulon makin turun. Makin sore. Pantesan udara mulai dingin. Aki dan Engkong masih uplek baca tabloid. Emang tuh kata orang bilang, kalo mereka kaya kaos kutang ama celana kolor. Setelan.  Kemana-mana selalu beduaan. Tapi…biarin dah, kan mereka selalu ngingetin kita dengan kongkownya nyang ngawur tapi bener.***

Majayus Irone/Budayawan/Rumahmediagrup.com/Cerpen