Kongkow Cerdas: Aki Maja dan Kong Usman

GEDONG TINGGI

                “Eh karang mah kalo kita jalan ngelewatin Kali Malang mulai dari Warung Kincan ampe Prisdo udah banyak bangat gedong nyang tinggi…”, Kong Usman buka omongan.

                “Pan setau saya, dulu mah cuman ada atu gedong nyang tinggi gede ngejegir di deket Tambun, namanya Gedong Juang. Emang karang ada gedong apa lagi, Kong?”, tanya Simun belaga bloon.

      Kong Usman nyengir maklum. Soalnya Simun tuh bocah baru kemarin nyang kencing aja belon lempeng. Umur si Simun paling juga jigohan. Anak nyang berumur cuman dualima mana tau perobahan. Bekasi sekarang sudah berobah. Dulu… di wilayah Bekasi ada banyak gedong gede dan bersejarah. Di Pondok Gede, dulu ada rumah gede nyang merupakan peninggalan jaman kolonial dan kini sudah lenyap disulap jadi  departemen  store. Tentu aja bocah karang mah kaga pada tau asal muasal nama Pondok Gede. Lantaran bangunan nyang jadi ikonnya ilang dialih fungsikan. Lantaran penguasanya waktu itu kurang idep ama sejarah?

      “Kalo nyang engkong maksud gedong gede dan tingngi itumah namanya apartemen, Kong”, kata Simun lagi.

      “Ya itu namanya. Temen..”

      “Emang engkong sudah pernah masuk sonoh, Kong?”

      “Kaga..”

Simun senyum. Kali ini dia ngerasa menang dan lebih tau soal kemajuan. Kalo bicara masa lalu Simun pasti kalah. Tapi kalo bicara perubahan dan masa kini Simun yakin lebih tau daripada Engkong.

      “Tuh gedong nyang sekarang banyak di kota namanya aneh-aneh kong. Ada Bekasi Square, Mall Metropolitan, Cyber Park, Blue Oasis, Giant dan laen-laennya”, cerita Simun lebih pede.

      Engkong Usman bingung. Mendadak Aki Maja datang langsung nimbrung. Dan ngerasa aneh ngeliat Engkong bingung.

      “Kenapa, Kong..?”

      “Engkong bingung gara-gara saya nyebutin nama gedong tinggi di kota..”, cerita Simun lagi.

      “Emang luh sebutin nama apa?” tanya Ki Maja pengen tau.

Simun ngebisikin dikuping Aki. Aki ngakak. Engkong tambah bingung.

      “ oh itu…dasar aja orang kita pada belagu. Nama lah pake kebarat-baratan. Pake nama bule gitu. Jelas aja Engkong kaga faham…”, kilah Ki Maja sambil mendekati Engong dan mulai ngajak ngomong.

      “Tuh, Kong nyang dulu rawa sekarang berobah jadi gedong tinggi. Ato onoh nyang dulu gerumbang karang dibangun tempat belanja. Pan dulu kita sering maen layangan disonoh”, kata Ki Maja.

      “Gue inget…nah tuh dia nyang bikin gue mikirin terus. Orang pada belagu amat sih. Nama tempat diganti-ganti. Apa nama nyang dulu kurang keren? Terus kalopun tuh gedong tinggi pada dibangun, gue mau tanya, coba siapa nyang nempatin?, tanya engkong Usman menikam.

      “Yah..emang nyang ngisiin bukan orang kita, Kong. Orang kaya mulu..”

      “Nah..terus apa untungnya buat kita nyang miskin dan kaga mampu beli tuh apartemen?, tanya Engkong kemudian

      “Ya…minimal bisa ngeliatin dan bangga dikit kalo kota kita dah maju..”. sahu Ki Maja sambil pegih ngayuh sepeda ontelnya.

      “Eh..luh mau kemana, Ki?”, teriak Engkong

      “Ke Mall..”.

      “Mau ngapain?”

      “Mejeng..”.

      “Ikut dong…”

Tuh Engkong empron ngenjot sepeda ontelnya juga. Simun ngejegrik dewekan.

      “Gila tuh orangtua. Udah bau tanah masih juga mau mejeng di Mall? Ntar dikira barang antik  lagi..”, gerutu Simun sambil mandangin apartemen nyang tinggi menjulang dan ngehayal ampe kapan bisa tidur disono dan punya satu kamar doang???*

Majayus Irone/Budayawan/Rumahmediagrup.com/Cerpen